Kompania amerikane “Johnson & Johnson” është përfshirë në një tjetër valë akuzash serioze, pasi mbi 3 000 persona në Britaninë e Madhe kanë ngritur padi kundër saj, duke pretenduar se pudra e famshme për foshnja përmban asbest — një substancë kancerogjene e ndaluar prej dekadash.

Paditësit kanë paraqitur çështjen në Gjykatën e Lartë të Londrës, duke akuzuar kompaninë se ka shitur me vetëdije produkte të kontaminuara, të cilat mendohet se kanë shkaktuar kancer të vezoreve dhe mezoteliomë, një formë e rrallë e kancerit që prek membranën e mushkërive.

Në padinë e ngritur nga firma ligjore KP Law, përmendet edhe Kenvue UK, kompania që u nda nga “Johnson & Johnson” në vitin 2023, dhe që akuzohet për shitjen e produkteve të dyshimta mes viteve 1965 dhe 2023.

Në reagimin e saj, Kenvue mohoi akuzat, duke deklaruar se pudra për foshnje “nuk përmban asbest dhe nuk shkakton kancer”.

Vetëm pak ditë më parë, një gjykatë në Kaliforni urdhëroi “Johnson & Johnson” të paguante 966 milionë dollarë dëmshpërblim për familjen e një gruaje që vdiq nga mezotelioma – një nga gjobat më të mëdha të dhëna ndonjëherë kundër kompanisë.

Kompania ka ndërprerë shitjet e pudrës me bazë talku në SHBA që prej vitit 2020, dhe në tregun global që nga viti 2023, duke e zëvendësuar me një formulë të re me bazë niseshte misri.

Ndërkohë, beteja ligjore ndaj “Johnson & Johnson” pritet të jetë një nga më të mëdhatë në historinë e kompanive farmaceutike, me pasoja që mund të zgjasin për vite.