Deputetja e Partisë Demokratike, Jorida Tabaku, ka kritikuar ashpër mazhorancën për mungesën e vullnetit politik në luftën kundër korrupsionit dhe për miratimin e ligjeve që dëmtojnë transparencën.

Në fjalën e saj, gjatë një konference të organizuar nga USAID dhe CSDG mbi bilbilfryrësit dhe denoncimin e korrupsionit, Tabaku evidentoi se veprimet e mazhorancës jo vetëm që minojnë demokracinë parlamentare, por gjithashtu penalizojnë ata që denoncojnë korrupsionin.

Ajo theksoi se ligji për konfliktin e interesit, një nismë kyçe për rritjen e llogaridhënies, është bllokuar prej kohësh në Komisionin e Ligjeve dhe nuk është përfshirë në kalendarin parlamentar për debat. “Kuvendi është kthyer në burim ligjesh me porosi, ndërsa nismat për transparencë qëndrojnë të bllokuara,” deklaroi ajo.

Tabaku solli në vëmendje edhe raste konkrete që tregojnë se ligji për bilbilfryrësit, ndonëse korrekt në teori, dështon në praktikë. Ajo theksoi se sistemi aktual është ndërtuar në mënyrë të tillë që të penalizojë dhe dekurajojë ata që denoncojnë korrupsionin, duke krijuar një mjedis ku denoncuesit bëhen viktima të sistemit në vend që të mbrohen.

Deputetja argumentoi se një mjedis i tillë jo vetëm që dëmton përpjekjet për një qeverisje më të mirë dhe të ndershme, por gjithashtu ul besimin e qytetarëve te drejtësia dhe institucionet.