Aktorja me famë botërore Julia Roberts ka bërë një hyrje triumfale në Festivalin e Filmit në Venecia, duke magjepsur publikun me një paraqitje plot stil dhe elegancë. 57-vjeçarja u shfaq në tapetin e kuq me një fustan të mrekullueshëm Versace blu marine, një krijim i dizajnuar nga Dario Vitale, drejtori i ri krijues i shtëpisë së modës italiane.

Fustani, i punuar me pëlhurë krep dhe i qëndisur me detaje të imta Damier në fije mëndafshi të zezë, u vlerësua si një nga paraqitjet më të bukura të festivalit. Roberts pozoi përkrah regjisorit Luca Guadagnino dhe aktorëve të tjerë të filmit “After the Hunt”, mes tyre Andrew Garfield, Ayo Edebiri dhe Chloë Sevigny.

Premiera e filmit u prit me duartrokitje të gjata prej gjashtë minutash, duke dëshmuar suksesin e tij që në prezantimin e parë. Julia Roberts interpreton rolin e një profesoreshe universiteti, e cila përballet me një krizë profesionale dhe personale pas akuzave të një studenteje ndaj një kolegu të saj.

Pas shfaqjes, emocionet ishin të papërshkrueshme. Regjisori dhe aktorët u përqafuan mes lotëve dhe buzëqeshjeve, ndërsa audienca shpërtheu në brohoritje. Ndër të pranishmit ishte edhe Monica Barbaro, e nominuar për Oscar për filmin “A Compete Unknown”, e cila do të bashkëpunojë me Guadagnino-n në projektin e tij të ardhshëm “Artificial”.

Julia Roberts jo vetëm mahniti me elegancën e saj, por edhe vërtetoi se vazhdon të mbetet një nga ikonat më të mëdha të Hollivudit.