Boksieri shqiptar Jurgen Uldedaj, vetëm pak javë pas fitores së tij në Londër ku u shpall kampion bote në kategorinë ‘cruiser’ në organizatën IBO, është nderuar me titullin “Qytetar Nderi” nga Bashkia Lezhë.

Kryebashkiaku Pjerin Ndreu e përshkroi Uldedajn si shembull të përkushtimit dhe stërvitjes serioze që çon në arritje të jashtëzakonshme: “Kampioni Jurgen Uldedaj është shembulli më i mirë që me përkushtim të paparë dhe stërvitje serioze ka arritur majat më të larta që një shqiptar ka arritur deri më sot”.

Vetë Uldedaj theksoi se fitorja e fundit nuk përbën majën e karrierës së tij, por një stacion në rrugëtimin e gjatë që ka përpara. “Kjo nuk është akoma maja. Kemi akoma rrugë për të bërë dhe shpresoj që t’ju bëj sa më krenar në të ardhmen,” deklaroi boksieri.