Kalbja dhe rrëzimi i një prej rrepeve të Izvorit, të cilat janë shpallur monument natyre u ka rrezikuar jetën anëtarëve të familjes Daupaj nga fshati Tragjas në Vlorë. Sëmundja që ka prekur rrepat, për më shumë se një vit është raportuar nga familja në fjalë pranë DRKK Vlorë dhe njësisë administrative Orikum.

Por mosmarrja e masave, në prerjen e degëve të dëmtuara, ka bërë që 3 ditë më parë, degët të bien mbi banesën dhe biznesin e familjes Daupaj, duke u rrezikuar jetën fëmijëve dhe bashkëshortëve të cilët kanë qenë në banesë.

Fatmirësisht dëmet kanë qenë materiale, por për kryefamiljarin Emiliano Daupaj situata është serioze pasi edhe rrepe të tjerë rrezikojnë të bien, ndërkohë që asnjë masë nuk është marrë për të larguar rrepin e rënë në banesa e tyre.

Emiliano Daupaj thotë se do ti drejtohet prokurorisë për neglizhencë të institucioneve. Ndërkohë që ai vetë nuk ndërhyn dot në pastrimin e rrepeve, pasi këto të fundit janë shpallur monument natyre.

“Kjo është një gjendje shumë alarmante pasi këtu kemi të bëjmë me rrezik për jetën time dhe të familjareve të mi, dhe kushdo banori që mund të ndodhet këtu, pasi kjo është pronë publike. E gjithë ndërtesa është shembur, fëmijët janë traumatizuar. Ky është një kërcënim për jetën e familjes time. Rrepat kanë tri ditë dhe janë Akoma mbi shtëpinë time. Asnjë institucion shtetëror nuk merr pergjegjësi përsipër”,– është shprehur Emiliano.

Ndërsa Ela, bashkëshortja e Emilianos ka qëndruar në ambulancë për të marrë ndihmën mjeksore. Për të gjithcka ka ndodhur ka qenë terrorizuese.