Kamber Sulçe është paraqitur në policinë e Gjirokastrës pas ngjarjes tragjike që ndodhi më 27 shtator në Salari të Tepelenës, ku një biznesmen italian humbi jetën.

Sipas hetimeve, viktima u qëllua për vdekje nga një distancë prej rreth 120 metrash, dyshohet nga Sulçe. Motivi i ngjarjes lidhet me një konflikt banal për dritat e gjata të makinës, mes autorit të dyshuar dhe djalit të ortakut të biznesmenit italian, Gazmend Braçi.

Në dëshminë e tij, Braçi tha se pas një zënke, automjeti i tij mbeti pa karburant dhe ai kërkoi ndihmën e të atit, i cili mbërriti bashkë me viktimën, me dy automjete të ndryshme. Braçi tregon:
“Ai qëllonte në ajër në mënyrë të përsëritur, ndërsa na shante nga distanca. Në një moment nisi të qëllonte drejt nesh dhe ne u shpërndamë. Eduardo shkoi të mbyllte derën e makinës së babit tim, që autori të mos e shihte. Fillimisht mbylli derën e shoferit, pastaj u përkul për të mbyllur derën e pasagjerit, kur u qëllua dhe u godit fatalisht. Ne u shtrimë barkas dhe qëndruam ashtu derisa mbërriti policia.”

Një tjetër dëshmitar tha se sulmi zgjati mbi 20 minuta me ndërprerje të herëpashershme, duke shkaktuar frikë dhe panik mes të pranishmëve.

Të dhënat nga kamerat e sigurisë dhe dëshmitë e marra në vendngjarje kanë ndihmuar në identifikimin e autorit 48-vjeçar. Policia dyshon se Sulçe është ndihmuar nga persona të tjerë për t’u larguar, pasi braktisi mjetin tip Ford, ngjyrë të bardhë, mes fshatrave Nivicë dhe Bolenë të Vlorës.