Një aksident i pazakontë është regjistruar pasditen e djeshme në autostradën Durrës–Rrogozhinë, në afërsi të Golemit, ku një kamion që transportonte produkte të markës “Amita” ka humbur kontrollin, duke shkaktuar shpërndarjen e qindra pakove në mes të rrugës.

Sipas dëshmitarëve në vendngjarje, shoferi i kamionit dyshohet se ka humbur kontrollin pas një manovre të papritur, ndërsa mbulesa e rimorkios mund të jetë hapur gjatë lëvizjes, duke bërë që ngarkesa të përfundonte në asfalt.

Fatmirësisht, nga incidenti nuk raportohet për persona të lënduar, por skena e krijuar ka shkaktuar kaos të përkohshëm në qarkullim, duke tërhequr vëmendjen e shumë drejtuesve të tjerë të mjeteve që kalonin në zonë.

Në vendngjarje kanë mbërritur forcat e policisë rrugore, të cilat po punojnë për qarkullimin e sigurt të automjeteve dhe për zbardhjen e plotë të shkaqeve të aksidentit.