Kanali amerikan “ABC7” ka publikuar një artikull që e cilëson historinë e Parashqevi Simakut si një “mrekulli”. Artikulli tregon se si një video e një akti të thjeshtë dashamirësie është shndërruar në një histori ndërkombëtare që lidh Shqipërinë me një nga ikonat e saj kulturore.
Në 10 dhjetor, ekipi i “7 On Your Side” po ndiqte një bamirësi lokale në Nju Jork, ku po shpërndaheshin çanta shpine për njerëzit e pastrehë. Gazetarja Nina Pineda e ndërpreu për një moment procesin dhe ndali për të folur me një grua që mori një nga dhuratat, një çantë shpine me furnizime dhe një shënim të shkruar me dorë me fjalë inkurajuese për fëmijë, nga një grup i quajtur “Vetëm Dashuri e Bekime”. Reagimi i gruas ishte një shpërthim i lumturisë për këtë dhuratë të thjeshtë.
Por ajo që ndodhi më pas ishte një ngjarje që po cilësohet si mrekulli. Gruaja që u takua me Pineda, e cila ishte tepër e gëzuar nga ky akt, zbuloi se ishte këngëtare. Dhe jo një këngëtare e zakonshme – ajo ishte Parashqevi Simaku, një nga yjet më të mëdha të muzikës shqiptare, e njohur si “Madona e Shqipërisë”. Një fan i saj, Bale Erbeli, e njohu menjëherë, duke e lidhur me një periudhë kur ajo kishte jetuar me familjen e saj në Nju Xhersi në vitin 1986, kur ajo filloi karrierën e saj.
Komuniteti shqiptaro-amerikan u bashkua menjëherë, duke shpërndarë videon dhe duke e bërë viral në rrjetet sociale. Videoja ka arritur deri tek një influencues i madh shqiptar, Elton Ilirjani, i cili është model dhe CEO. Ai e gjeti Simakun brenda dy ditëve në Penn Station, duke ofruar ndihmën e tij dhe duke i blerë një dhomë hoteli.
“Kam pesë vjet që e kërkoja,” tha Ilirjani, duke shtuar se “vrapova drejt saj dhe e përqafova”. Ai tregon se Simaku bëri një dush të gjatë, u kujdes për veten dhe më pas këndoi në restorantin Hudson Yards, duke i kënduar në anglisht dhe frëngjisht.
Simaku, e cila tani ka rikthyer shkëlqimin e saj, ka deklaruar për mediat se askush nuk shkon nga rrugët drejt yjeve, por se ajo ndjehet më e fuqishme dhe më e mbështetur nga komuniteti i saj. Ky ngjarje shënon një kthim të paharrueshëm për një ikonë kulturore shqiptare, e cila, falë një akti të thjeshtë dashamirësie, ka rifituar dashurinë dhe mbështetjen e një komuniteti të tërë.
