Edmond Lajçi ka pranuar fajësinë për vrasjen e gruas së tij, Gjyljeta Ukellës, në prill të këtij viti. Ai e bëri këtë deklaratë në seancën fillestare të martën në Gjykatën Themelore në Pejë, ku kërkoi falje nga familjarët e viktimës për veprimet e tij.
“Fajtor… faktikisht unë jam që nja 10 vjet si i mbyllur në burg, jashtë prej jetës, prej gjithkujt, prej gjithçkafit,” tha i akuzuari, duke shprehur pendesë për krimin që kishte kryer. “I kërkoj falje familjes së të ndjerës për veprimet,” shtoi ai.
Prokuroria Themelore në Pejë ngriti aktakuzë më 19 nëntor 2024 kundër Edmond Lajqit, i cili akuzohet për vrasjen e bashkëshortes së tij, Gjyljeta Ukellës, më 16 prill 2024, në Pejë. Sipas dosjes së Prokurorisë, pas krimit, Lajqi ishte paraqitur vetë në polici, duke deklaruar se kishte vrarë gruan dhe duke kërkuar që të dërgohej një patrullë për të marrë masa.
