Situatë dramatike paraqitet në aksin Prrenjas – Librazhd, ku dhjetëra qytetarë kanë mbetur të bllokuar për orë të tëra, pa një informacion të qartë mbi zhvillimet dhe alternativat e mundshme të lëvizjes.

Sipas njoftimeve fillestare nga Autoriteti Rrugor Shqiptar, qarkullimi do të devijohej përmes aksit Maliq – Moglicë. Megjithatë, edhe kjo rrugë rezulton e bllokuar prej kohësh. Pavarësisht se ishte paralajmëruar se do të lejohej vetëm kalimi i mjeteve të vogla, tre trajlera kanë mbetur të bllokuara në segment, duke paralizuar plotësisht qarkullimin.

Qytetarët raportojnë mungesë koordinimi dhe informimi në terren. Një prej tyre rrëfen se është nisur nga zona e Qukës, por është detyruar të kthehet pas, pasi policia e ka orientuar drejt rrugës për në Lozhë, e cila gjithashtu rezultoi e pakalueshme.

“U kthyem nga rruga, sot ka qenë një katastrofë e vërtetë. Kam që në orën 13:00 i bllokuar. Nuk dimë as ku të ikim dhe as ku do ta kalojmë natën”, shprehet ai.

Një moment prekës është regjistruar kur, për shkak të lodhjes dhe ngarkesës emocionale pas orëve të gjata në pritje, një gruaje i ka rënë të fikët. “Mos kesh rrugë të ikësh në shtëpi. Më gjeni rrugën nga të iki në shtëpi”, është dëgjuar të thotë ajo para se të humbte ndjenjat.

Ndërkohë, drejtuesit e mjeteve kërkojnë ndërhyrje të menjëhershme dhe informim të saktë mbi situatën, për të shmangur përkeqësimin e mëtejshëm të gjendjes në terren.