Seanca plenare në Kuvendin e Shqipërisë është ndërprerë nga kaosi, pasi deputetët e opozitës ndërprenë kryeministrin Edi Rama sapo ai nisi të fliste për projektbuxhetin e vitit 2025. Kryeministri Rama, në momentin kur filloi të fliste për bonuset për pensionistët, u përball me ndërhyrje dhe reagime të forta nga deputetët opozitarë, të cilët u ngritën në këmbë dhe nisën të flisnin, duke mos e lejuar të vazhdonte.

Kryetarja e Kuvendit, Elisa Spiropali, ndërhyri disa herë për të rivendosur rendin, duke u kërkuar deputetëve të uleshin dhe të dëgjonin fjalën e kryeministrit. Ajo apeloi për respektimin e rregullores së Kuvendit dhe për të ruajtur qetësinë gjatë prezantimit të projektbuxhetit.

Spiropali: “Ju lutem uluni, Kryeministri po flet. Më pas keni fjalën aq sa minutazh ka kryeministri. Qytetarët na ndjekin. Do të keni rast t’i shprehni të gjitha pakënaqësitë tuaja. Rregullorja përcakton që nuk mund të ndërpritet seanca.”

Pavarësisht thirrjeve të Spiropalit, deputetët e opozitës vazhduan me ndërhyrjet, duke e detyruar kryetaren e Kuvendit të ndërpresë seancën për një pushim prej pesë minutash. Ky incident pasqyron tensionet e forta mes qeverisë dhe opozitës, veçanërisht në çështjet që lidhen me buxhetin dhe politikat ekonomike.