Sarandë – Një 29-vjeçar është arrestuar në fshatin Xarë, pas kapjes së tij duke transportuar një emigrant të paligjshëm drejt kufirit me Greqinë.

Ngjarja ndodhi në zonën e quajtur “Sorone”, ku autoritetet ndaluan një automjet tip Volkswagen që po lëvizte me një shtetas të huaj pa dokumentacion të rregullt.

Sipas hetimeve paraprake, drejtuesi i automjetit, A. K., banues në Karbunarë, Lushnjë, kishte marrë pagesë për të transportuar një shtetas nga Pakistani me qëllim kalimin e paligjshëm të kufirit.

Automjeti u sekuestrua si provë materiale, ndërsa hetimet vijojnë për të identifikuar persona të tjerë të përfshirë. Materialet procedurale janë referuar Prokurorisë pranë Gjykatës së Shkallës së Parë Sarandë, për veprën penale “Ndihma për kalim të paligjshëm të kufijve”.