Një tjetër rast i kultivimit të bimëve narkotike është goditur nga Policia e Fierit, në kuadër të operacionit të koduar “Koordinata”, me arrestimin e një 48-vjeçari dhe procedimin penal të babait të tij.

Në pranga ka rënë Eduart Gjikoli, banues në Pojan, i cili u kap në flagrancë teksa po kujdesej për rreth 1000 bimë kanabisi, të mbjella përgjatë kanaleve kulluese në fshatin Povelçë, në një zonë të njohur si “Fushat e fshatit”.

Sipas njoftimit zyrtar të Policisë, bimët narkotike janë asgjësuar me anë të djegies, ndërkohë që hetimet kanë zbuluar se në këtë aktivitet të paligjshëm dyshohet të jetë i përfshirë edhe babai i 48-vjeçarit, një 77-vjeçar me inicialet E. Gj., i cili është proceduar penalisht.

Gjatë kontrollit të banesës së Eduart Gjikolit, forcat e rendit sekuestruan një armë zjarri pistoletë, dy krehëra dhe 14 fishekë luftarak, të cilat i përkisnin të arrestuarit dhe ndihmuan në ngarkimin e tij me akuzat për “Kultivim të bimëve narkotike” dhe “Mbajtje pa leje e armëve dhe municioneve luftarake”.

Policia thekson se operacioni “Koordinata” vijon, me qëllim parandalimin, evidentimin dhe goditjen e rasteve të kultivimit të bimëve narkotike në territorin e qarkut Fier. Ndërkohë, hetimet po thellohen për të identifikuar persona të tjerë të përfshirë në këtë veprimtari kriminale.