Policia italiane në Napoli ka arrestuar Ciro Andolfi, 49 vjeç, i cili ishte në kërkim që prej vitit 2022 dhe ndaj të cilit ishte lëshuar një urdhër arresti për vuajtjen e një dënimi të mbetur prej 8 vitesh, 3 muajsh dhe 10 ditësh burg.

Andolfi akuzohet për pjesëmarrje në organizatë kriminale të tipit mafioz, zhvatje në bashkëpunim e rënduar nga metoda mafioze dhe korrupsion. Ai figuronte në listën e 100 personave më të rrezikshëm të kërkuar nga Ministria e Brendshme italiane.

Operacioni për kapjen e tij u zhvillua në lagjen Barra të Napolit, ku i dyshuari u gjet i fshehur në një bunker të ndërtuar brenda një apartamenti që po kontrollohej nga autoritetet. Sipas hetuesve, Andolfi konsiderohet pjesë e një klani të kamorrës.

Arrestimi u krye në zbatim të një vendimi të Prokurorisë së Përgjithshme pranë Gjykatës së Apelit të Napolit. Karabinierët bënë të ditur se ky është arrestimi i 22-të i një të arratisuri të rrezikshëm i realizuar gjatë një viti.