Deputetja e Partisë së Lirisë, Erisa Xhixho, ka shprehur një reagim të fortë lidhur me ndryshimet ligjore për komisionet hetimore të miratuara nga Partia Socialiste. Në një postim në rrjetin social Facebook, Xhixho akuzon se sot ka kapitulluar Parlamentarizmi dhe ligji i miratuar nga mazhoranca shkel Kushtetutën duke privuar opozitën nga të drejta themelore të kontrollit parlamentar.
Deputetja shprehet se ky ligj është një mënyrë për të hequr të drejtën e opozitës për të ngritur komisione hetimore, duke e akuzuar mazhorancën për mbylljen përfundimtare të kësaj të drejte thelbësore. Ajo gjithashtu argumenton se ky ligj është bërë funksional para miratimit, duke rrëzuar 8 kërkesa të opozitës për krijimin e komisioneve hetimore.
Xhixho akuzon mazhorancën se po përpiqet të shmanget llogaridhënies dhe transparencës me qytetarët duke mbyllur dyert e komisioneve parlamentare. Ajo beson se arsyeja pse mazhoranca nuk e do kontrollin hetimor është për të mbrojtur veprat e vjetra të vjedhjeve, abuzimeve dhe korrupsionit në vend.
Postimi
Sot kapitulloi Parlamentarizmi.
Sot maxhoranca miratoi me forcën e kartonave mbylljen përfundimisht të të drejtës për ngritjen e komisioneve hetimore parlamentare.
Një ligj tërësisht në shkelje të Kushtetutës, që i heq opozitës të drejtën e e ushtrimit të kontrollit parlamentar.
Në fakt, ky ligj është bërë funksional që para se të miratohej, pasi 8 kërkesa për ngritjen e komisioneve hetimore janë rrëzuar me arrogancën e pushtetit.
E njëjta maxhorancë që ngriti sistemin e patronazhistëve e që nuk mbrojti dot të dhënat e shqiptarëve, do të mbyllë dyert e komisioneve parlamentare me argumentin se duhen mbrojtur të dhënat e dëshmitarëve.
Arsyeja pse kjo maxhoracë nuk i do komisionet hetimore është se do t”i shmanget llogaridhënies e transparencës me qytetarët, sepse vjedhjet, abuzimi dhe korrupsioni janë praktika e zakonshme e saj.
Sot kapitulloi kontrolli parlamentar, transparenca, llogaridhënia si detyrim ndaj qytetarëve.
