Policia Kufitare në Pikën e Kalimit Kufitar Kapshticë ka goditur një tjetër rast të kontrabandës me mallra të akcizës, si pjesë e kontrolleve të shtuara në kufi.

Në hyrje të territorit shqiptar u kap në flagrancë shtetasi S. L., 48 vjeç, banues në fshatin Plug, Lushnjë, i cili po tentonte të fuste në mënyrë të paligjshme 32 steka me cigare dhe produkte të ndryshme ushqimore, pa i deklaruar pranë autoriteteve doganore.

Mallrat ishin fshehur në automjetin që ai drejtonte, në kundërshtim me ligjin doganor dhe me qëllim shmangien e detyrimeve fiskale.

Pas përfundimit të veprimeve procedurale, 48-vjeçari u arrestua për veprën penale “Kontrabanda me mallra që paguajnë akcizë”. Mallrat u sekuestruan në cilësinë e provës materiale, ndërsa materialet procedurale iu kaluan Prokurorisë së Korçës për veprime të mëtejshme ligjore.

Policia Kufitare njofton se kontrollet intensive do të vijojnë në të gjitha pikat kufitare, për të parandaluar dhe goditur çdo tentativë për trafikim apo kontrabandë mallrash.