Profesori i kriminalistikës Ervin Karamuço ka folur mbi sulmin kibernetik ndaj e-maileve të prokurorëve të SPAK, ngjarje që ndodhi më 12 mars dhe çoi në arrestimin e Arnold Rrokajt dhe Zambak Gjonit, të dyshuar për ndërhyrje dhe shpërndarje të të dhënave të vjedhura. Por sipas tij, ata nuk janë të vetmit të përfshirë në këtë krim.

Në një intervistë, Karamuço deklaroi se sulmi kishte si qëllim të gjithë kompjuterat e prokurorëve të SPAK, por vetëm tre prej tyre u komprometuan. Ai tha se kompjuteri i kreut të SPAK, Altin Dumani, dhe disa të tjerë ishin të pajisur me nivel më të lartë sigurie, falë kujdesit të prokurorëve dhe survejimit të personelit të IT-së.

“Tentativa është bërë për të gjithë kompjuterat e prokurorëve të SPAK, por ia kanë dalë vetëm me tre. Kompjuterat e tjerë kishin më shumë mbrojtje, kishin ndryshuar paswordet dhe ishin nën vëzhgim të stafit të IT-së,” – tha Karamuço.

Ai shtoi se sistemet e brendshme të teknologjisë, përfshirë laboratorët dhe të dhënat kriminalistike, janë të pavarura dhe shumë të mbrojtura, çka ka shmangur një dëmtim edhe më të madh.

Ngjarja ka ngritur shqetësime serioze mbi sigurinë kibernetike të institucioneve të drejtësisë në vend dhe rolin e grupeve të organizuara në këto sulme. Hetimet për të zbuluar bashkëpunëtorët dhe motivet vazhdojnë.