Katër shtetas shqiptarë, të moshës nga 27 deri në 36 vjeç, mbeten pas hekurave në burgun e Montacutos, pas një operacioni të karabinierëve italianë që zbuloi një seri vjedhjesh në rajonin e Ankonës.

Sipas mediave italiane, shqiptarët dyshohen si autorë të vjedhjeve në Montemarciano, Marina dhe Osimo, të kryera natën mes të premtes dhe të shtunës së kaluar. Gjyqtari Giovanni Manzoni ka konfirmuar masën e arrestit për të katërt, të cilët kanë zgjedhur të mos japin dëshmi gjatë marrjes në pyetje.

Dy prej tyre, 27 dhe 30 vjeç, punonin në bujqësi në jug të Italisë; 34-vjeçari ishte banues në Parma, ndërsa 36-vjeçari kishte qëndrim të përkohshëm në Porto Recanati. Të gjithë mbrohen nga avokatë të ndryshëm italianë.

Sipas hetimeve, katër shqiptarët ishin specializuar në grabitje banesash. Ata kishin marrë me qira një apartament në Via Giusti, Porto Recanati, që e përdornin si bazë për bastisjet dhe largoheshin menjëherë pas çdo goditjeje.

Rreth orës 2:30 të natës, karabinierët e Osimos, të cilët po e ndiqnin grupin prej ditësh, ndërhynë në banesë dhe i arrestuan në flagrancë. Brenda u gjetën stoli dhe sende me vlerë, përfshirë varëse, unaza e byzylykë prej ari.

Gjatë kontrollit të një Fiat 500, policia gjeti një orë luksoze “Patek Philippe”, me vlerë deri në 100 mijë euro, që dyshohet të jetë pjesë e sendeve të vjedhura. Hetuesit po verifikojnë origjinën e saj dhe po kërkojnë pjesën tjetër të bizhuterive të zhdukura.

Autoritetet italiane po hetojnë gjithashtu rrjetin e bashkëpunëtorëve që mund të kenë ndihmuar shqiptarët në shpërndarjen e mallrave të vjedhura, ndërsa pritet që ditët në vijim të ketë zhvillime të reja në hetim.