Kryeministri britanik, Keir Starmer, i ka bërë thirrje presidentit rus, Vladimir Putin, të ndalojë së “luajturi lojëra” me armëpushimin dhe të angazhohet seriozisht në negociatat për paqe.

Starmer do të organizojë sot një videokonferencë me liderë botërorë nga 25 vende, për të diskutuar mbi ruajtjen e paqes në Ukrainë, duke e quajtur këtë nismë “koalicioni i të gatshëmve”. Në këtë takim do të marrin pjesë vendet evropiane, Komisioni i BE-së, NATO, Kanadaja, Ukraina, Australia dhe Zelanda e Re.

Liderët do të shqyrtojnë rrugët e mundshme për të ndaluar agresionin rus, nëse një marrëveshje paqeje ndërmjetësohet nga presidenti amerikan, Donald Trump.

Kievi ka dhënë mbështetjen për një armëpushim 30-ditor të propozuar nga SHBA, por Moska ka vazhduar luftimet dhe ka shprehur gatishmëri vetëm nëse përmbushen disa kushte të saj.

“Ne nuk mund të lejojmë që presidenti Putin të luajë lojëra me marrëveshjen e presidentit Trump,” tha Starmer përpara takimit. “Mospërfillja e plotë e Kremlinit për këtë propozim tregon se Putini nuk është serioz për paqen.”

Ai shtoi se nëse Rusia pranon bisedimet, atëherë duhet të ketë një monitorim të rreptë për të siguruar një paqe të qëndrueshme dhe serioze. Në rast të kundërt, Britania dhe aleatët do të forcojnë presionin ekonomik ndaj Rusisë.

Nga ana tjetër, Putini ka sinjalizuar gatishmërinë për të mbështetur armëpushimin, por ka kërkuar që Ukraina të heqë dorë nga anëtarësimi në NATO dhe të pranojë humbjen e territoreve të pushtuara nga Rusia.

Lufta në Ukrainë vazhdon, ndërsa përpjekjet diplomatike për paqen mbeten të pasigurta.