Është zbuluar fotoja e 24-vjeçares Kejsi Spaillari, e shpallur në kërkim nga Prokuroria e Korçës për akuzën e “vrasjes me dashje” kryer në bashkëpunim. Viktima e ngjarjes makabre të ndodhur në vitin 2018 ishte Antonio Karafili, ish-partneri i saj.

Pas lëshimit të urdhrit të arrestit, Spaillari, e cila prej disa kohësh ndodhet në Kanada, ka reaguar në mënyrë të pazakontë në rrjetet sociale duke ngritur gishtin e mesit – një gjest sfidues drejtuar autoriteteve shqiptare dhe mediave që raportuan për rastin.

Sipas dosjes hetimore, Spaillari dhe bashkëpunëtori i saj, Rexhep Vathi nga Derveni i Krujës, kanë mbytur Karafilin me çarçaf dhe më pas kanë tentuar ta paraqesin ngjarjen si vetëvrasje, duke e lidhur trupin e tij në një pemë në Voskopojë. Krimi ka ndodhur pas një konflikti të ashpër për arsye xhelozie.

Vathi, bashkëpunëtori në krim, është vetëvrarë një vit më parë, ndërsa Spaillari u largua nga Shqipëria dhe u vendos në Kanada, ku mendohet të ketë nisur një jetë të re. Prokuroria e Korçës ka lëshuar masën e sigurisë “arrest në burg” ndaj saj dhe ka ngarkuar Policinë e Shtetit për lokalizimin dhe ekstradimin.

Çështja tashmë është kaluar për gjykim në Gjykatën e Krujës, ku Kejsi Spaillari është e pandehura e vetme në këtë proces. Vëmendja publike dhe presioni ndaj institucioneve është rritur, ndërsa mbetet për t’u parë nëse autoritetet do të arrijnë të sigurojnë praninë e saj në sallën e gjyqit.