Kelly Osbourne ka reaguar ashpër ndaj komenteve negative për humbjen e saj të dukshme në peshë, ndërsa po kalon një periudhë tejet të rëndë familjare. Nëna e saj, Sharon Osbourne, i doli plotësisht në krah gjatë një interviste me Piers Morgan, ku foli edhe për ditët e fundit të Ozzy Osbourne.

Gjatë intervistës u transmetua një video e Kelly-t — e hequr më vonë nga Instagrami — ku ajo i drejtohej ndjekësve që kishin komentuar në mënyrë fyese për pamjen e saj.

Kelly shprehej:

“Për ata që shkruajnë ‘A je e sëmurë?’ apo ‘Është Ozempic, nuk dukesh mirë’: babai im sapo vdiq. Po bëj më të mirën që mundem. Zgjedh të ndaj vetëm pjesën e lumtur të jetës sime, jo atë të mjerueshme. Dhe sinqerisht… f— off.”

Sharon Osbourne, gjithashtu e goditur emocionalisht nga humbja e bashkëshortit, e mbrojti publikisht të bijën:

“Ajo ka humbur babain e saj. Nuk mund të hajë tani. Po kalon një moment shumë të vështirë.”

Kelly Osbourne, sot 41 vjeç, është rritur para kamerave që prej moshës 15-vjeçare përmes reality show-t “The Osbournes”, dhe ka folur shpesh për betejat e saj me imazhin e trupit dhe presionin publik.

Ky reagim i fundit shënon një qëndrim të prerë ndaj kritikëve që gjykojnë pamjen e saj, teksa ajo vetë ndodhet në një nga periudhat më të dhimbshme të jetës.