Këngëtarja shqiptare me reputacion ndërkombëtar, Bebe Rexha së fundmi ka përjetuar një prej eksperiencave më të shëmtuara gjatë një koncerti të saj.

Ylli i hitit “I got you” është përfshirë në një ngjarje të paprecedentë, pasi që përderisa po këndonte në skenë, dikush nga publiku e ka gjuajtur me telefon duke e goditur në fytyrë.

Menjëherë pas goditjes, artistja 33-vjeçe është ulur në gjunjë si dhe ka pranuar ndihmën mjekësore të stafit të saj, derisa e gjithë ngjarja ka ndodhur në “The Rooftop” të Pier të SHBA-ve, teksa po realizonte turneun “Best F’n night of my life”.

Video incizimet nga incidenti i Rexhës janë publikuar në të gjitha mediat sociale dhe të njëjtat janë bërë virale.

Adhuruesit e artistes kanë reaguar në mbështetje të saj, derisa e kanë dënuar veprimin e fansit që i shkaktoi edhe plagë në fytyrë këngëtares. Akoma nuk dihet se cilat janë arsyet që qëndrojnë pas kësaj goditjeje me telefon.

Përndryshe, së fundmi Bebe Rexha dhe DJ i njohur francez, David Guetta kanë vazhduar të shijojnë suksesin e bashkëpunimit të tyre të fundit “I’m Good (Blue)”.