Në Bosnjë e Hercegovinë, ekipet e shpëtimit po vazhdojnë kërkimet për rreth 40 persona të zhdukur pas vërshimeve vdekjeprurëse që ndodhën gjatë javës së kaluar. Gjatë periudhës së shirave dhe rrëshqitjes së dheut më 3 dhe 4 tetor, kanë humbur jetën të paktën 17 persona dhe shumë të tjerë kanë mbetur të lënduar.

Për të ndihmuar në përballimin e pasojave të kësaj katastrofe natyrore, Kroacia ka ofruar një ndihmë financiare prej 10 milionë eurosh për rehabilitimin e zonave të prekura. Sipas njoftimit të Qeverisë kroate, këto fonde do t’i dërgohen Këshillit të Ministrave të Bosnjë-Hercegovinës me qëllim për të mbështetur popullatën në nevojë dhe për të rindërtuar infrastrukturën e shkatërruar.

“Qeveria e Kroacisë, duke marrë parasysh shkallën e fatkeqësisë natyrore në Bosnjë dhe Hercegovinë, vendosi të ndajë fonde në vlerë prej 10 milionë euro për të ofruar ndihmë urgjente në rehabilitimin e pasojave të përmbytjeve dhe për të siguruar nevojat bazë për viktimat dhe të evakuuarit,” thuhet në njoftimin e qeverisë.