Asambleja Parlamentare e Këshillit të Evropës (APKiE) miratoi sot raportin për zgjedhjet parlamentare të mbajtura më 11 maj 2025 në Shqipëri, duke theksuar nevojën për reforma të thella dhe vullnet të fortë politik nga autoritetet shqiptare.
Në një rezolutë të miratuar nga Asambleja, autoritetet shqiptare u bënë thirrje të adresojnë me prioritet mangësitë e evidentuara gjatë misionit të vëzhgimit zgjedhor, “në mënyrë që të sigurohet përputhshmëria me standardet evropiane në proceset zgjedhore”.
APKiE kërkoi:
• Zbatim të rekomandimeve të Komisionit të Venecias dhe OSBE/ODIHR-it;
• Rishikim të rregullave të financimit të fushatës;
• Depolitizim të administratës zgjedhore;
• Ndarje të qartë mes partisë në pushtet dhe shtetit;
• Forcim të kapaciteteve të SPAK, veçanërisht në hetimin e korrupsionit dhe krimit të organizuar që ndikon zgjedhjet.
Raporti i përgatitur nga Simone Billi (Itali, ECPA) dhe i paraqitur nga Luz Martinez Seijo (Spanjë, SOC), konstaton se zgjedhjet ishin “konkurruese dhe të zhvilluara në mënyrë profesionale”, por u zhvilluan në një klimë jashtëzakonisht të polarizuar.
Ndër gjetjet kryesore të raportit janë:
• Kandidatët kishin përgjithësisht mundësi të bënin fushatë lirshëm, por pati raportime për frikësim dhe presion.
• Votimi i diasporës, për herë të parë i mundësuar, vlerësohet si një hap historik, por kërkon përmirësime.
• Partia në pushtet shfrytëzoi burime shtetërore në fushatë, duke krijuar avantazh të padrejtë.
• Pati pretendime për blerje votash dhe presion mbi votues, sidomos në sektorin publik.
• Mediet ishin të dominuara nga dy partitë kryesore, me vetëcensurë të gazetarëve dhe përqendrim të pronësisë.
• Dita e zgjedhjeve ishte përgjithësisht e qetë, por me shkelje procedurash në shumë qendra votimi, si dhe ndërhyrje të vëzhguesve dhe anëtarëve të partive në proces.
Asambleja e mbylli rezolutën me thirrjen që autoritetet shqiptare të demonstrojnë angazhim real për integritetin zgjedhor, si një kusht i domosdoshëm për besueshmërinë demokratike dhe përparimin drejt Bashkimit Evropian.
