Kevin Hajrulla, i cili mbeti i plagosur në fund të dhjetorit të vitit 2024 në një atentat në Vlorë, ka dalë nga spitali i Traumës ku qëndroi për më shumë se një muaj. Ai shpëtoi mrekullisht nga atentati ku u qëllua me 24 plumba.

Në deklaratën e tij para hetuesve, Hajrulla ka këmbëngulur se nuk ka asnjë lidhje me botën e krimit. Ndërkohë, një shitës që ndodhej aty pranë atentatit gjithashtu ka mbetur i plagosur.

Pas ngjarjes, autorët e atentatit u larguan në drejtim të fshatit Panaja, ku djegën automjetin që kishin përdorur. Brenda automjetit u gjetën dy armë zjarri tip kallashnikov dhe dy krehër fishekë. Hajrulla është kushëri i Inez Hajrullës, një prej bosëve të krimit në Vlorë, dhe dyshohet se atentati mund të ketë pasur lidhje me përplasje brenda grupeve kriminale.

Inez Hajrulla është në përplasje me Bernard Sinamatin, kreun e një grupi kundërshtar, dhe dyshohet se atentati ndaj Kevin Hajrullës mund të ketë lidhje me këto përplasje. Policia e Vlorës ka sekuestruar 3 automjete të blinduara të grupit të Inez Hajrullës, por ende nuk ka ndërmarrë veprime për të pyetur të dyshuarin. Hetimet për atentatin janë në vazhdim, por deri tani, provat nuk janë të mjaftueshme për të identifikuar autorët.