Aktori i njohur Kevin Spacey ka reaguar pas artikujve që e paraqisnin si të pastrehë, duke sqaruar se nuk ndodhet në situatë të tillë. Në një postim në rrjetet sociale, ylli i “American Beauty” tha:

“Pas artikujve të fundit që pretendojnë se jam i pastrehë, e ndjej të nevojshme të reagoj, jo vetëm ndaj shtypit, por ndaj mijëra njerëzve që më kanë kontaktuar gjatë këtyre ditëve, duke më ofruar një vend për të qëndruar, ose thjesht për të më pyetur nëse jam mirë.”

Spacey theksoi se jeton shumicën e kohës në hotele dhe Airbnb, për shkak të punës:

“Në bisedën time me gazetarin Mick Brown, thashë që në thelb po jetoja në hotele dhe Airbnb dhe po shkoja atje ku ka punë. Kam punuar pothuajse në mënyrë të pandërprerë gjatë gjithë këtij viti dhe jam jashtëzakonisht mirënjohës.”

Ai gjithashtu theksoi se ka shumë njerëz që përballen me vështirësi të mëdha financiare, por ai nuk është në të njëjtën situatë:

“Dhe zemra më dhemb për ta. Por, është e qartë nga vetë artikulli se unë nuk jam një prej tyre, dhe nuk kam tentuar të them se jam.”

Spacey pranoi se situata e tij financiare “nuk është e mirë” pas skandalit për sulm seksual, të cilin ai e mohoi dhe u shpall i pafajshëm në gjykatë, duke shtuar se “kostot gjatë këtyre shtatë viteve kanë qenë astronomike.”