Në Shkup, kryeqyteti i Maqedonisë së Veriut, janë rikthyer parullat antishqiptare, të cilat shpërthejnë herë pas here pas periudhave politike ose elektorale. Në një stacion autobusi pranë konviktit “Goce Dellçev” u gjet një mbishkrim me të bardhë:

“Smrtza shqiptari – Vdekje shqiptarëve”

Aktivisti i shoqërisë civile, Ylli Pacuku, pasi mësoi për mbishkrimin që kishte qëndruar aty disa ditë, shkoi vetë dhe e fshiu frazën që nxit urrejtje. Ai komentoi në rrjetet sociale:

“Ky mbishkrim me urrejtje te stacioni i autobusit para konviktit Goce Delçev ka qenë disa ditë duke qarkulluar nëpër rrjete sociale. Prisja ta pastronin, por meqë qëndroi ende, thjesht e pastrova vet. Nuk është asgjë e madhe, thjesht nuk dua të kaloj çdo ditë në një vend ku edhe vetë kam pritur autobus më herët dhe të shoh fjalë që s’kanë vend në një hapësirë studentore, e as në këtë qytet.”

Pacuku shtoi një mesazh për autorët e parullave:

“E sa u përket atyre që i shkruajnë këto… ndoshta është koha të investojnë më shumë te mendja sesa te markerat.”

Postimi i tij u shpërnda edhe nga Bujar Osmani, nënkryetar i BDI-së dhe ish-ministër i Jashtëm i Maqedonisë së Veriut.

Autoritetet lokale nuk kanë dhënë ndonjë deklaratë për këtë rast, duke lënë një boshllëk reagimi ndaj një akti që nxiti reagime në rrjetet sociale dhe komunitetin shqiptar në Shkup.