Khloe Kardashian, një nga figurat më të njohura të klanit Kardashian-Jenner, është përballur sërish me kritika për përdorimin e photoshop-it në rrjetet sociale, pavarësisht pretendimeve të saj se ka hequr dorë nga kjo praktikë.

Në episodin më të fundit të podcast-it të saj “Khloe in Wonderland”, 41-vjeçarja pranoi se dikur ka pasur një periudhë kur modifikonte rëndë fotot e saj dhe ishte thellësisht e prekur nga perceptimi publik. Ajo tregoi se gjatë viteve është ndjerë e pasigurt për pamjen, duke u etiketuar shpesh si “motra e shëndoshë”, etiketim që, sipas saj, ka lënë gjurmë.

“Mendoj se ka pasur një kohë kur të gjithë ishim të konsumuar nga ky stil jetese me filtra. Nuk mund ta shihnim më veten pa një filtër”, u shpreh Kardashian. “Ishte poshtëruese që unë mendoja se ai version i rregulluar i vetes ishte më i mirë.”

Megjithatë, edhe pse Khloe deklaron se nuk e përdor më photoshop-in për të ndryshuar imazhin e saj, ndjekësit mbeten skeptikë, duke komentuar se fotot e saj në Instagram vijojnë të duken të manipuluara. Ajo vetë e pranon se ende bën qindra shkrepje për të zgjedhur atë “perfekte”, dhe shpesh e pëlqen më shumë veten në video sesa në foto.

“Nuk mendoj se jam fotozhenike. Bëj 500 foto për të marrë një që më pëlqen. Dhe kjo është në rregull”, tha ajo.

Në rrëfimin e saj, bashkëthemeluesja e markës “Good American” tregoi se po përpiqet të riprogramojë mënyrën si e sheh veten, duke hequr dorë nga standardet e rreme të bukurisë që i janë imponuar ndër vite.

“Duhet t’i heqim filtrat. Kjo nuk është e vërtetë. Nuk dukem kështu dhe nuk dua të dukem kështu”, përfundoi Khloe.