Kim Kardashian ka folur për herë të parë për arsyet që e çuan drejt ndarjes nga Kanye West, duke e përshkruar martesën e tyre si “toksike”.

Në një intervistë për podcastin Call Her Daddy, ylli i reality show-t dhe biznesmenia 44-vjeçare rrëfeu për marrëdhënien e saj me reperin, me të cilin ishte e martuar nga 2014 deri në 2022.

Ajo tregoi se fillimisht ishte tërhequr nga inteligjenca e Kanye-s dhe se kishin kaluar një periudhë të bukur së bashku, por gjithçka ndryshoi kur ai filloi të shfaqte probleme me shëndetin mendor dhe të kthehej kundër saj dhe familjes së saj.

“Kur dikush nuk është i gatshëm të bëjë ndryshime që do ta ndihmonin vërtet, bëhet shumë e vështirë të qëndrosh në një marrëdhënie që mund të jetë toksike,” tha Kim.

Ndarja ishte veçanërisht e dhimbshme për shkak të katër fëmijëve që ata kanë së bashku. Kim tregoi se për një kohë të gjatë mbajti shpresën se Kanye do të shërohej, duke shtuar se momentet kur reperi sulmonte publikisht anëtarët e familjes së saj ishin shumë të vështira: “Nëse dikush ndjehet ashtu për familjen time, atëherë nuk duhet të jemi bashkë.”

Ajo gjithashtu përmendi pasigurinë që ndjente gjatë martesës, jo vetëm emocionale, por edhe financiare, duke kujtuar se automjetet e shtrenjta shpesh zhdukeshin dhe më pas riktheheshin pa paralajmërim, gjë që e bënte jetën shumë të paqëndrueshme për një familje me fëmijë.

Pavarësisht sfidave, Kim vlerësoi mbështetjen e familjes së saj në vendimin për të ndarë rrugët: “Ata e dinin sa shumë dashuri dhe respekt kisha për këtë marrëdhënie dhe se do të bëja gjithçka për ta bërë që të funksiononte.”

Ajo pranoi gjithashtu se kishte frikë nga reagimi i publikut, veçanërisht për shkak të problemeve të shëndetit mendor të Kanye-s, por theksoi se nuk e sheh fundin e martesës si një dështim, duke shtuar se vitet e kaluar së bashku dhe familja që ata ndajnë do t’i lidhin gjithmonë.