Kina ka mirëpritur hyrjen në fuqi të marrëveshjes së armëpushimit në Gaza, duke theksuar nevojën për një zbatim të plotë dhe të vazhdueshëm të saj.

“Kina mirëpret hyrjen në fuqi të marrëveshjes së armëpushimit të Gazës. Shpresojmë se marrëveshja do të zbatohet plotësisht dhe do të arrihet një armëpushim gjithëpërfshirës dhe i përhershëm,” deklaroi zëdhënësja e Ministrisë së Jashtme, Mao Ning, gjatë një konference për shtyp.

Ajo shtoi se Pekini do të vijojë të bashkëpunojë me komunitetin ndërkombëtar për të promovuar paqen dhe stabilitetin në Lindjen e Mesme, duke theksuar se një zgjidhje e drejtë dhe afatgjatë është thelbësore për t’i dhënë fund konfliktit.

Kina ka qenë historikisht mbështetëse e kauzës palestineze dhe e një zgjidhjeje me dy shtete për konfliktin izraelito-palestinez. Ajo është pozicionuar si një aktor më neutral krahasuar me Shtetet e Bashkuara, duke bërë thirrje të përsëritura që Izraeli të ndalojë atë që e cilëson si një “katastrofë humanitare” në Gaza.

Përmes diplomacisë aktive, Kina synon të luajë një rol më të madh në përpjekjet ndërkombëtare për paqe, duke kërkuar një zgjidhje të qëndrueshme për krizën në Lindjen e Mesme.