Pekin – Një institut kërkimor ushtarak në Kinë ka zbuluar një mikrodron të ri spiun, i cili imiton mushkonjën, duke ngritur shqetësime në lidhje me përdorimin e teknologjive të avancuara për mbikëqyrje të fshehtë.

Në një transmetim të datës 20 qershor në televizionin shtetëror ushtarak CCTV-7, u prezantua ky dron ultramikroskopik, i cili ka vetëm 2 centimetra gjatësi dhe peshon vetëm 0.3 gramë. Liang Hexiang, student në Universitetin Kombëtar të Teknologjisë së Mbrojtjes (NUDT), e paraqiti pajisjen duke e përshkruar atë si një robot që ngjan si mushkonjë.

Droni përmban dy krahë të vegjël që përplasen deri në 500 herë në sekondë, tre këmbë të holla dhe sensorë të avancuar për mbikëqyrje, të gjitha të integruara në një trup të ngjashëm me një shkop. Një prototip tjetër me katër krahë, i kontrolluar përmes një smartphone-i, u prezantua gjithashtu nga ekipi i zhvilluesve.

Ekspertët vënë në dukje se përmasat jashtëzakonisht të vogla e bëjnë pajisjen pothuajse të padukshme për radarët tradicionalë, duke ngritur shqetësime të mëdha për përdorimin e saj në operacione spiunazhi dhe mbikëqyrjeje të fshehtë.

Ky zhvillim vjen në kohën kur përdorimi i mikrodronëve në fushën ushtarake po rritet me ritme të shpejta në mbarë botën. Për shembull, Norvegjia ka zhvilluar dronin “Grerëza e Zezë”, një pajisje e vogël me kamera dhe sensorë termikë që përdoret nga ushtria amerikane për zbulim të shpejtë.

Ndërkaq, SHBA ka eksperimentuar prej vitesh me teknologji të ngjashme, përfshirë projektin HI-MEMS të DARPA-s, i cili synon krijimin e “kiborgëve insektesh” duke integruar sisteme mikro-mekanike brenda trupit të insekteve të gjalla.

Ekspertët paralajmërojnë se teknologjitë e tilla mund të shënojnë fillimin e një epoke të re të luftës kibernetike dhe mbikëqyrjes së fshehtë, me pasoja të rëndësishme për sigurinë globale dhe privatësinë individuale.