Pekini është i hapur për rifillimin e bisedimeve tregtare me Shtetet e Bashkuara, por thekson se çdo dialog duhet të bazohet në respekt të ndërsjellë, konsistencë dhe reciprocitet më të madh nga administrata Trump. Kështu është shprehur një burim i afërt me qeverinë kineze, në prag të shpalljes së tarifave të reja nga presidenti Donald Trump më 2 prill.

Sipas të njëjtit burim, Kina kishte caktuar tashmë një përfaqësues për të negociuar me SHBA, por kishte paqartësi nga ana amerikane në lidhje me kanalet zyrtare të komunikimit. “Trump mund të dëshirojë të jetë vetë negociatori, por kjo nuk është në përputhje me mënyrën se si funksionon diplomacia kineze”, theksoi ai.

Burimi komentoi edhe retorikën armiqësore të disa anëtarëve të kabinetit të Trump ndaj Kinës, duke theksuar se mungesa e një distancimi të qartë nga presidenti amerikan nxit pasiguri në marrëdhënie. Ai përmendi veçanërisht komentet fyese të nënpresidentit JD Vance, i cili kishte përdorur termin “fshatarë kinezë” në një intervistë, duke nxitur reagime të ashpra në rrjetet sociale kineze.

Nga ana tjetër, Kina kërkon që edhe shqetësimet e saj të merren seriozisht, përfshirë kufizimet teknologjike të vendosura nga Uashingtoni dhe çështjen e Tajvanit, të cilin Pekini e konsideron territor të vetin.

Lufta tregtare mes SHBA-së dhe Kinës ka ndezur tensione globale dhe ka ndikuar negativisht në ekonominë ndërkombëtare. Megjithëse Kina ka treguar gatishmëri për negociata, mbetet për t’u parë nëse palët do të gjejnë terren të përbashkët për uljen e tensioneve.