Teksa nesër sindikata e Pedagogëve ka njoftuar një protestë kombëtare para Universitetit Politeknik, vjen një reagim nga kryetari i Partisë Demokratike, Sali Berisha.
Ky i fundit publikoi videomesazhin e pedagogut të Universitetit Bujqësor, Lush Susaj ku i bënte thirrje studentëve që t’i bashkohen protestës së nesërme.
“Nesër në orën 11 të gjitha universitete te Shqipërisë, Korçën, Elbasanin, Gjirokastrën, Shkodrën, Durrësin, të mblidhemi para Politeknikut për të protestuar jo për xhepin tonë, por për të shpëtuar arsimin dhe shkollën shqipe. Tmerri më i madh i armiqve dhe pedagogëve të Shqipërisë, është prosperimi i shkollës shqipe dhe i universiteteve. Ju bëjmë thirrje studentëve të Shqipërisë, që nëse e kanë llogaritur të jetojnë në këtë vend, t’i bashkohen protestës. Kjo protestë është për të rinjtë dhe jo ne 60-vjeçarët. Që ata mos të ikin me gomone jashtë, por të vijnë të mbarojnë universitetin, por të punojnë në shtetin e tyre.”, tha në mesazhin e tij pedagogu.
Ndërkohë, sipas Berishës kjo është përgjigja më e mirë për shantazhet dhe kërcënimet që iu bëhen pedagogëve nga ana e institucioneve qeveritare.
“Kjo është përgjigja e merituar për arrogancën, kërcënimet dhe cinizmin e Edi Ramës për kërkesat e drejta të Sindikatës së Universiteteve. Mbështetje totale kauzës së tyre të drejtë! sb”, shkruan Berisha.
