Artisti dhe ish-banori i Big Brother VIP, Klajdi, i cili u eliminua disa javë më parë, ka reflektuar mbi eksperiencën e tij në shtëpinë më të famshme në Shqipëri. Në një intervistë të fundit, ai ndau mendimet e tij mbi strategjitë e lojës, marrëdhëniet me banorët dhe planet për të ardhmen në karrierën muzikore.

Strategjia që do të kishte ndjekur nëse do të kishte një shans të dytë

Kur u pyet nga gazetarja Lei nëse do të kishte një strategji të re në rast të një rikthimi në lojë, Klajdi u shpreh:

“E mendova, por nuk do të kisha një strategji të mirëfilltë. Do të isha më i çelur, me më shumë humor, batuta dhe këngë. Do të isha marrë më shumë me Rozanën, por jo në mënyrë sulmuese. Ajo më nxori në pah atë anën karagjoze që kam brenda vetes, ndaj do të bëja një aleancë me të, jo për lojë, por për të sjellë më shumë pozitivitet në shtëpi.”

Rikthimi në muzikë dhe suksesi i këngës “E bukur”

Pas daljes nga Big Brother VIP, Klajdi nuk humbi kohë dhe u rikthye fuqishëm në muzikë me këngën e tij më të fundit, “E bukur”. Ai ndau emocionet mbi mënyrën se si është pritur kjo këngë nga publiku:

“Reaksioni ka qenë shumë pozitiv. Të gjitha vajzat e pëlqejnë, përveç asaj që unë ia kam dedikuar. Kam fituar zemrën e çdo vajze, vetëm të asaj që dua unë, nuk e kam fituar. Nuk e kam bërë publike se për kë është kënga, por ajo e ka pëlqyer këngën, vetëm që unë nuk po i pëlqej. Ka 10 vjet që e pëlqej këtë vajzën, por ose nuk e kupton, ose nuk do që ta kuptojë.”

Klajdi vazhdon të jetë i përkushtuar ndaj muzikës dhe projekteve të tij të ardhshme, ndërsa fansat e tij presin me kuriozitet hapat e tij të radhës si artist.