Gjykata Komerciale e Kosovës ka vendosur që të aprovohet si e bazuar kërkesa e Klan Kosovës për shtyrjen e ekzekutimit të vendimeve në lidhje me rastin e saj.

Gjyqtari në këtë rast ishte Arnis Dumani.

“APROVOHET si e bazuar kërkesa e paditësit Klan Kosova Sh.p.k. për shtyrjen e ekzekutivimit të vendimeve.” – shkruhet në pikën e parë të Aktvendimit.

Ndërsa më vonë tregohet se është shtyrë vendimi i Komisionit për Shqyrtimin e Ankesave për Regjistrimin e Bizneseve.

Arsyetimi i Gjykatës Komerciale ndërkohë është mjaft interesant. Aty përmendet se si Klan Kosova është një “ndër ofruesit e shërbimeve mediale audio-vizuale me mbulimin më të madh në Kosovë dhe e licencuar pranë Komisionit të Pavarur për Media, si dhe një nga punëdhënësit më të mëdhenj në fushën e mediave me rreth 220 të punësuar dhe qindra bashkëpunëtorë komercialë, andaj ekzekutimi i vendimit për pezullimin e certifikatës së biznesit paditësit do t’i shkaktonte dëm vështirë të riparueshëm…”

Po ashtu, Gjykata Komerciale ka vlerësuar se Klan Kosova “ka bërë përmirësimet e nevojshme në shoqërinë tregtare të regjistruar në Maqedoninë e Veriut,”

Kujtojmë se Ministria e Tregtisë, e udhëhequr nga Rozeta Hajdari, e pretendonte të kundërtën në disa reagime publike.