Në një operacion të gjerë ndërkombëtar, klani shqiptar i narkotrafikut, i cili dyshohej se kishte depërtuar deri në zyrtarët e lartë të administratës në Bolonja, është goditur nga autoritetet italiane, duke çuar në dënimin e 18 personave të implikuar, shumica prej të cilëve shqiptarë. Hetimet, të cilat nisën në vitin 2020, zbuluan lidhje të ngushta të këtij grupi me rrjete të tjera ndërkombëtare të trafikut të drogës, veçanërisht kokainës që vinte nga Amerika e Jugut dhe shpërndahej kryesisht në rajonin Emilia-Romagna, përfshirë qytetin e Bolonjës.
Një nga personat kyç të këtij grupi, Gianluca Fiore, shofer kamioni nga Forli dhe i afërm i disa zyrtarëve vendas, u dënua me 14 vjet e 8 muaj burgim, përfshirë një gjobë prej 50 mijë euro dhe shpenzimet gjyqësore. Fiore u dënua për bashkëpunim në trafikimin e drogës, konkretisht për transportin e 140 kilogramëve kokainë. Ai ishte një nga 18 të akuzuarit që u dënua pas një procesi të shkurtuar gjyqësor, i cili çoi gjithashtu në uljen e dënimit për disa të tjerë.
Hetimet e drejtuara nga autoritetet italiane zbuluan se Fiore kishte një rol të rëndësishëm në rrjetin e narkotrafikut, duke ndihmuar në transportin e ngarkesave të drogës me kamion. Operacioni i koduar “Rekrutuesi” çoi në arrestimin e 13 personave, të cilët ishin kryesisht banorë të provincës së Forlit. Gjatë këtij operacioni, autoritetet sekuestruan rreth 114 kilogramë kokainë, 37 kilogramë hashash dhe më shumë se një milion euro.
Dënimet e fundit përfshijnë edhe tre shqiptarë të dyshuar si drejtues të organizatës, Redi Hoxha, i cili mori 20 vjet burg, dhe dy të afërm të tij, Agim dhe Bashkim Proshka, të cilët u dënuan me 19.4 dhe 19.6 vite burgim për përfshirje në aktivitetet kriminale të narkotrafikut.
Hetimet e policisë italiane treguan se dy grupe kriminale, një në Emilia dhe tjetra në Romagna, vepronin mes provincave të Forlì-Cesena dhe Rimini, dhe kishin lidhje të drejtpërdrejta me grupe kriminale jashtë vendit. Organizata kishte një strukturë hierarkike të fortë, duke përdorur mjetet transportuese dhe pasurinë e madhe për të mundësuar operacionet e saj.
Emri i Gianluca Fiores u shfaq për herë të parë në gusht 2020, kur ai u përfshi në një ngjarje ku dy vëllezër italianë po transportonin 28 kilogramë kokainë nga Belgjika në Itali në bordin e një kamioni, të shoqëruar nga një makinë tjetër ku udhëtonte Fiore dhe një shqiptar. Ky arrestim shërbeu si pikënisje për hetimet që çuan në zbulimin dhe shpërbërjen e rrjetit të narkotrafikut, i cili operonte në shkallë të gjerë dhe kishte ndikim të madh në rajonin e Bolonjës.
