Pastori Akil Pano, përfaqësues i Koalicionit Pro Familjes, ka reaguar ashpër ndaj projekt-ligjit për barazinë gjinore, duke e cilësuar atë si “kancer” dhe “sëmundje” për shoqërinë shqiptare.

I ftuar në emisionin Opinion, Pano u shpreh se sipas natyrës, ekzistojnë vetëm dy gjini – mashkulli dhe femra – dhe se ky ligj, sipas tij, kërcënon dimensionin kulturor dhe natyror të shoqërisë.

“Ky projektligj në thelb është një kancer, është një sëmundje, e cila synon të shkatërrojë trupin kombëtar dhe dimensionin kulturor, natyrës dhe dimensioneve… është natyra mashkull dhe femër, burrë grua dhe këto dy gjini duhet t’i mbrojmë deri në fund,” tha Pano.

Ai shtoi se qeveria aktuale po ndjek linja të ngjashme me politikën ndërkombëtare, duke përmendur shembuj të Shteteve të Bashkuara: “Kësaj qeverie i ka ngelur ora në kohën e Biden, Trump ka thënë ekzistojnë vetëm dy gjini.”

Deklaratat e tij kanë ngjallur debat të gjerë në opinion publik, duke reflektuar ndasitë që ekzistojnë në shoqëri për temat e barazisë gjinore dhe të drejtave LGBTQ+. Koalicioni Pro Familjes mbetet i vendosur në kundërshtimin e projektligjit, ndërsa debati parlamentar dhe publik pritet të intensifikohet në ditët në vijim.