Kolegji Zgjedhor ka hedhur poshtë kërkesën ankimore të koalicionit opozitar “PD-ASHM” për shpalljen e pavlefshme të zgjedhjeve parlamentare të 11 majit në Qarkun Vlorë. Vendimi vjen pas shqyrtimit të pretendimeve të Partisë Demokratike dhe aleatëve të saj, të cilët kishin ankimuar vendimin e Komisionit të Ankimimeve dhe Sanksioneve (KAS).

Gjatë seancës, PD ngriti shqetësime për shkelje të pretenduara në proces, veçanërisht në lidhje me votën e diasporës dhe dyshime për manipulim të rezultatit zgjedhor.

Megjithatë, Kolegji Zgjedhor i cilësoi këto pretendime të pabazuara në prova, duke vendosur rrëzimin e kërkesës ankimore.

Ky është vendimi i katërt rradhazi në disfavor të opozitës, pas rrëzimit të kërkesave të ngjashme për qarqet Berat, Dibër dhe Shkodër dy ditë më parë.

Me këtë vendim, konsolidohet rezultati zyrtar i Komisionit Qendror të Zgjedhjeve për Qarkun Vlorë, ndërkohë që opozita mbetet e vendosur për të vijuar betejën politike për, siç thotë ajo, rikthimin e besimit te vota e lirë.