Tirana – Komisionerja e Bashkimit Europian për Zgjerimin, Marta Kos, vizitoi sot Tiranën dhe ripërsëriti mbështetjen e BE-së për rrugën drejt integrimit të vendeve të Ballkanit Perëndimor. Ajo theksoi se Bashkimi Europian duhet të bëhet realitet i prekshëm për të gjitha vendet e rajonit dhe se Shqipëria dhe Mali i Zi po kryesojnë procesin si vende pararojë.

Kos u shpreh se “të gjithë vendet e Ballkanit Perëndimor i përkasin BE dhe duhet të bëhen shtete anëtarë me të drejta të plota, si shpërblim për përafrimin me legjislacionin dhe vlerat e BE”. Ajo theksoi se përshpejtimi i reformave dhe zbatimi i Planit të Rritjes janë kyç për suksesin e integrimit dhe për të tërhequr investitorë të huaj në rajon.

Komisionerja nënvizoi se qytetarët dhe bizneset po përfitojnë tashmë nga instrumente si SEPA, duke ulur kostot e transaksioneve dhe duke përforcuar lidhjen mes vendeve të rajonit dhe BE-së. “Na mbeten edhe dy vite për t’i kthyer Plani i Rritjes në një histori suksesi dhe për të përgatitur terrenin për integrimin tuaj në BE”, tha Kos.