Komisioni Shtetëror i Zgjedhjeve (KSHZ) ka bërë publike projektvendimin për votën e diasporës, i cili përmban detaje të rëndësishme mbi mënyrën e regjistrimit dhe përgatitjen e listës së votuesve që dëshirojnë të votojnë nga jashtë vendit.

Sipas projektvendimit, çdo zgjedhës që dëshiron të ushtrojë të drejtën e tij të votës nga jashtë duhet të paraqesë një kërkesë individuale për regjistrim në listën e zgjedhësve që votojnë jashtë vendit, drejtuar Komisionit Qendror të Zgjedhjeve. Afati për paraqitjen e këtyre kërkesave fillon 120 ditë para datës së zgjedhjeve dhe përfundon 68 ditë para kësaj date.

Komisioneri Shtetëror i Zgjedhjeve do të njoftojë publikisht për hapjen e procesit të hartimit të listës së zgjedhësve që votojnë nga jashtë vendit jo më vonë se 10 ditë para fillimit të këtij procesi. Kërkesa për regjistrim do të kryhet përmes një Platforme Elektronike të Regjistrimit (PER), e cila do të krijohet, mirëmbahet dhe përditësohet nga KQZ. Zgjedhësit do të kenë mundësinë ta shkarkojnë këtë platformë në versionin desktop dhe mobile, pa pagesë dhe pa u kushtuar nga lloji i pajisjes elektronike që do të përdorin.

Sa i përket listës së zgjedhësve që votojnë jashtë vendit, projektvendimi thekson se do të ketë një listë të vetme në nivel zone zgjedhore, e cila do të përmbajë të gjithë shtetasit shqiptarë që kanë shprehur vullnetin për të votuar nga jashtë dhe që janë të regjistruar në Regjistrin Kombëtar të Gjendjes Civile përkatës.

“Lista e zgjedhësve që votojnë jashtë vendit do të hartohet dhe përdoret rishtazi për çdo palë zgjedhje për Kuvendin. KQZ-ja dhe Drejtoria e Përgjithshme e Gjendjes Civile do të ruajnë bazën e të dhënave të zgjedhësve që votojnë nga jashtë vendit për çdo palë zgjedhje,” përfundon projektvendimi.

Kjo iniciativë synon të rrisë pjesëmarrjen e diasporës në procesin zgjedhor dhe të lehtësojë ushtimin e të drejtës së votës për shqiptarët që jetojnë jashtë vendit.