Silva Bino, shefja e Departamentit të Epidemiologjisë pranë ISHP-së, deklaroi sot në mbledhjen e Komitetit Teknik të Ekspertëve se pjesa më e madhe e vendit ka një ulje të incidencës së infektimeve, në gjithë bashkitë e mëdha.

“Aktualisht të gjitha bashkitë e mëdha kanë incidencë të ulët përvec rritjes në bashkinë Lezhë dhe Kukës si bashki të mëdha e disa bashki të tjera të vogla.

Kemi arritur një pikë të pozitivitetit që shkon në 5%, është një element shumë i rëndësishëm në këtë moment që flasim. S’kemi pasur ndonjëherë pozitivitet kaq të ulët, lidhur dhe me numrin e testimeve që po bëhen.

Ky është element që flet për ulje të qarkullimit të virusit në vend“.

Silva Bino pranoi se ka pasur disa persona që janë infektuar pas marrjes së dozës së vaksinës, po asnjëri nuk ka shkuar në spital.

“Nuk shohim raste që shkojnë në spital e janë të vaksinuar deri tani, pra kanë shfaqur forma të lehta, deri tani. Situata po ndiqet, e kur flasim, flasim për të gjitha llojet e vaksinave”, tha ajo.

Shefja e Epidemiologjisë tha se po matet gjithashtu impakiti që ka vaksinimi në gjithë grupmpshat tek raporti i vdekshmërisë nga Covid.

“Ky slide tregon rritjen e numrit të vaksinimit me dozë të parë dhe uljes së numrit të vdekjeve, vdekjet janë më të larta në moshat mbi 60 vjec, pra ka impakt të vaksinimit te numri i vdekjeve. Ky është lajm tepër i mirë.

Besoj që deri në tetor apo në fundvit ne do jemi një vend me mbulesë të lartë vaksinale se shikojmë që ardhja e absorbimi i vaksinave nga sistemi shëndetësor pra dhënia e vaksinimit në qendra shëndetësore, në vende pune, pika të grumbulluara ka bërë që kjo përthithje të jetë shumë e shpejtë prandaj Shqipëria është një nga vendet që quhet sukses në lidhje me këtë program”, tha Bino.

Sipas Binos, Gjirokastra është rrethi me mbulesën më të lartë vaksinale, pasi kjo lidhet e me numrin e popullatës në moshë të thyer që ka ky qark.