Një ngjarje e rëndë ka ndodhur të premten, më 30 gusht, në burgun e Torinos, ku rreth 40 të burgosur shqiptarë u përfshinë në një përplasje të dhunshme me të burgosurit marokenë. Incidenti u shkaktua pasi një i burgosur shqiptar mbeti i plagosur rëndë pasi u godit me thikë në fytyrë një ditë më parë, më 29 gusht.

Përleshja filloi kur të burgosurit shqiptarë u konfliktuan fillimisht me oficerët e policisë që përpiqeshin t’i ndalonin. Ata arritën të vjedhin çelësat e qelive dhe më pas u futën në seksionin e 12-të në katin e tretë të burgut, ku rrahën një të burgosur maroken në shenjë hakmarrjeje për mikun e tyre të plagosur. Sipas raportimeve të sindikatës Osapp, incidenti ishte jashtëzakonisht i dhunshëm.

Gjatë përplasjes, dy efektivë policie mbetën të plagosur, pasi të dënuarit përdorën një krevat fëmijësh për të bllokuar portat, duke penguar gardianët e burgut që të ndërhynin. Kjo përkeqësoi situatën dhe e bëri më të vështirë kontrollin e situatës.

Sekretari i Përgjithshëm i Sindikatës së Policëve të Sistemit Penitenciar, Leo Beneducci, ka deklaruar se burgu i Torinos është në një gjendje kaotike dhe në duart e të burgosurve. “Në luftën midis bandave që tashmë karakterizon burgun e Torinos dhe shumë prej infrastrukturave të tjera penitenciare, punonjësit e policisë së burgjeve janë krejtësisht të pafuqishëm dhe të paaftë për të reaguar në kohë. Marrja e çelësave dëshmon pikërisht këtë,” ka theksuar Beneduci.

Kjo situatë ka ngritur shqetësime serioze për sigurinë dhe menaxhimin e burgjeve në Itali, veçanërisht në burgun e Torinos, ku tensionet mes grupeve të ndryshme të të burgosurve duket se janë jashtë kontrollit.