Një konflikt mes një burri dhe një gruaje është regjistruar mbrëmjen e sotme në lagjen nr. 4 të qytetit të Durrësit, duke shkaktuar shqetësim mes banorëve të zonës.

Sipas burimeve për media, debati verbal mes dy personave ka degraduar në përplasje fizike. Pas sherrit, gruaja, e revoltuar, është larguar dhe më pas është rikthyer në një lokal të zonës, duke mbajtur në dorë një shufër hekuri, me qëllim për të goditur personin tjetër të përfshirë në konflikt.

Ngjarja ka tërhequr vëmendjen e qytetarëve, ndërsa disa persona janë grumbulluar në ambientet e jashtme të lokalit. Ende nuk dihen shkaqet e konfliktit dhe as marrëdhënia mes dy të përfshirëve.

Burime nga vendngjarja bëjnë me dije se në zonë ka qenë i pranishëm edhe një punonjës i policisë rrugore, por sipas dëshmitarëve, ai nuk ka ndërhyrë për të ndalur konfliktin.

Nuk raportohet për persona të lënduar, ndërsa pritet një reagim zyrtar nga Policia për të sqaruar rrethanat e plota të ngjarjes.