Një konflikt mes dy personave në Durrës ka përfunduar me plagosjen e një 26-vjeçari, i cili është transportuar për ndihmë mjekësore në Spitali Rajonal Durrës.

Ngjarja ka ndodhur rreth orës 14:00, kur i riu me inicialet R.K. është paraqitur në spital me plagë në këmbë të shkaktuar nga një mjet prerës, si dhe me dëmtime të tjera fizike të marra gjatë një konflikti me një person tjetër.

Sipas informacioneve paraprake, 26-vjeçari është përfshirë në një sherr me shtetasin A.N., rreth 35 vjeç. Gjatë përplasjes, ky i fundit dyshohet se e ka goditur dhe plagosur në këmbë me mjet prerës.

I plagosuri ndodhet nën kujdesin e mjekëve dhe raportohet se është jashtë rrezikut për jetën. Ndërkohë, policia është vënë në kërkim të 35-vjeçarit, ndërsa grupi hetimor po punon për zbardhjen e plotë të rrethanave dhe dokumentimin ligjor të ngjarjes.