Një ngjarje e rëndë ka ndodhur në Himarë, ku një 27-vjeçar është arrestuar nga policia pasi ka plagosur me thikë kunatin e tij. Ngjarja ka ndodhur në ambientet e jashtme të një lokali dhe dyshohet se motivi i konfliktit ka qenë i dobët.

Sipas burimeve, i dyshuari D. H., banues në Himarë, pas një debati verbal ka goditur me thikë bashkëshortin e motrës së tij, shtetasin S. Q., 37 vjeç, banues në Librazhd. I plagosuri ndodhet aktualisht në spital, jashtë rrezikut për jetën.

Reagimi i Policisë

Pas marrjes së njoftimit, shërbimet e Komisariatit të Policisë Himarë ndërhynë menjëherë për të parandaluar përshkallëzimin e mëtejshëm të konfliktit. Në bashkëpunim me Seksionin për Hetimin e Krimeve ndaj Personit të DVP Vlorë, u bë i mundur arrestimi i autorit të dyshuar.

Në njoftimin zyrtar të policisë thuhet:

“Shërbimet e Komisariatit të Policisë Himarë, mbrëmjen e djeshme, pas njoftimit se në ambientet e jashtme të një lokali po konfliktoheshin dy shtetas, kanë ndërhyrë menjëherë për të parandaluar përshkallëzimin e konfliktit. Si rezultat i veprimeve të shpejta, u kap dhe u vu në pranga shtetasi D. H., 27 vjeç, banues në Himarë, për veprën penale ‘Plagosja e rëndë me dashje’.”