Këshilltari për Çështjet Ekonomike në Partinë Demokratike dhe nënkryetar i Këshillit Bashkiak të Tiranës, Dorian Teliti, ka reaguar ashpër pas konfliktit të ndodhur një ditë më parë në Ksamil, duke vënë theksin te dështimi i shtetit për të menaxhuar situatën.

Në një deklaratë publikuar në rrjetet sociale, Teliti dënoi me forcë aktin e dhunës, por theksoi se rrënjët e problemit shtrihen thellë në vendimet e paplanifikuara të qeverisë, të cilat, sipas tij, nuk marrin parasysh realitetin në terren.

“Dhuna duhet ndëshkuar, por kush e ndezi shkëndijën e konfliktit në Ksamil?”, pyet Teliti, duke theksuar se vendimet e fundit që u japin hoteleve të drejtën për të menaxhuar hapësirat e plazhit kanë lënë në harresë operatorët ekzistues, të cilët prej vitesh kanë investuar në këto zona me leje të dhëna nga vetë shteti.

Ai solli si shembull një rast konkret, ku një lokal kishte vepruar për 13 vite me leje të rregullt, por u përball me pretendimet e një hoteli që kërkonte lirimin e hapësirës, bazuar në një ligj të ri. “Kjo është një përplasje që vjen si pasojë e mungesës së planifikimit afatgjatë dhe koordinimit nga ana e autoriteteve”, shkroi Teliti.

Sipas tij, është e papranueshme që ligje të reja të aplikohen pa konsideruar aktivitetet ekzistuese, duke rritur kështu pasigurinë për bizneset dhe krijuar terren për konflikte mes qytetarëve.

“Është koha që shteti të marrë përgjegjësitë e veta. Dhuna në këtë rast ishte pasojë, por shkaku është më i thellë dhe kërkon zgjidhje politike e administrative”, përfundon reagimin Teliti.