Artisti Gjesti, fitues i “Big Brother VIP Albania”, është arrestuar nën dyshimet për tri vepra penale: “kanosje”, “asgjësim apo dëmtim i pasurisë” dhe “mbajtje pa leje të armëve”.

Sipas dyshimeve, ai ka hyrë në ambientet e kompanisë muzikore Onima, ku pretendohet se kanë ndodhur incidentet që çuan në procedimin penal.

Në lidhje me rastin, në emisionin Kosova Today ka folur avokati i tij, Burim Azemi, i cili ka dhënë detaje mbi marrëdhënien kontraktuale mes artistit dhe kompanisë.

Sipas Azemit, kontrata e distribucionit mes Gjestit dhe “Onima”-s është firmosur në qershor të vitit 2023, me afat dyvjeçar, deri në qershor 2025, dhe parashikonte mundësinë e mosvazhdimit vetëm nëse njoftimi bëhej 90 ditë përpara.

Avokati theksoi se artisti kishte shprehur zyrtarisht vullnetin për të mos e vazhduar kontratën përpara hyrjes në “Big Brother”, por sipas tij, marrëveshja është rinovuar pavarësisht këtij qëndrimi.

“Gjesti ka qenë në pamundësi për të bërë njoftimin 90 ditë para, pasi ndodhej në Big Brother. Megjithatë, ai dhe familja e tij kishin njoftuar më herët se nuk dëshironte vazhdimin e kontratës. Kontrata është vazhduar kundër vullnetit të tij”, u shpreh avokati.

Ndërkohë, kujtohet se Gjesti u lirua nga paraburgimi më 19 mars. Çështja mbetet në hetim, ndërsa priten zhvillime të tjera nga autoritetet për zbardhjen e plotë të rrethanave.