Në Komisionin e Ekonomisë dhe Financave ka pasur replika mes deputetes së PD, Jorida Tabaku dhe ministres se Financave, Delina Ibrahimaj.

Tabaku ka kërkuar nga ministrja që ti shpjegojë si janë përllogaritur analizat e risqeve. Sipas saj, buxheti nuk reflekton situatën reale.

Nga ana e saj, ministrja e Financave tha se nuk e ka këtë material dhe se nesër do ta përgatisë dhe do t’ja paraqesë Komisionit.

Tabaku: Zonja ministre në asnjë fjalë të pr/buxhetit të paraqitur dhe të relacionit të paraqitur keni thënë 30 herë fjalën transparencë sot. Nuk flitet për risqet e kontratave koncesionare. Po të marrë një shembull të thjeshtë:

Inceneratori i Tiranës, në momentin që u prezantua në buxhet për herë të parë dhe në vitet në vijim thoshte 1 mld lekë në vit. Në vitin pasardhës paguam 1.3 mld lekë në vit. Do të vazhdojë të rritet deri në 1.8 mld lekë. Ky është risku i kontratës. Kur ti e ke lënë të hapur kontratën në varësi të sasisë së mbetjeve. Janë paguar në vitet e fundit për riskut të kontratave 30 mln euro më shumë. Nuk ke transparencë këtu, nuk e ke llogaritur. Prandaj po të them që buxheti nuk reflekton situatën reale. Ju pyeta në mënyrë specifike. Në regjistrimin e borxhit cilët janë kreditë e materializuara nga konferenca e donatorëve për rindërtimin. Në buxhet thoni se janë  90 mln euro të finalizuara dhe 160 janë në proces e sipër. Ku janë të reflektuara 250 mln euro borxh të marrë nga angazhimet e konferencës së donatorëve. Ku i ke të reflektuara këtu, pse nuk janë të regjistruara këtu?

Fjalën transparencë 30 herë e dëgjova. Ku është analiza e risqeve të kontratave koncesionare. Sa u miratua kontrata koncesionare e Rrugës së Arbrit dhe sa po paguan kontrata e rrugës së Arbrit. Sa u miratua kontrata koncesionare e inceneratorit të Tiranës dhe sa po paguan cdo vit kontrata e inceneratorit të Tiranës.

Ibrahimaj: Sa i përket borxhit janë të planifikuara ato kontrata që janë të përmbyllura. Unë në fjalën time thashë që do të përgatis një material dhe do tja paraqes komisionit ditën e nesërme.

Sa i përket pagesave nga buxheti i shtetit për koncesionët që përmendën janë në tabelën 1 faqe 50 të dokumenteve. Përsa i takon rrugës së Arbrit janë parashikuar 3 mld lekë për 2022/ Sa i përket inceneratorit të Tiranës janë të parashikuara 1.5 mld lekë.

Tabaku: Mos bëjmë sikur nuk kuptojmë.  Ju thashë inceneratori i Tiranës ishte në buxhet para disa vitesh 1 mld, u pagua 1.3 mld. E keni rritur në 1.5 mld. E kishit për 10 vite 1 mld, jeni duke paguar 1.3, do rritet në 1.8.

Si është llogaritur ky risk në buxhetin e shtetit? Risqet e kontratave koncesionare.

Vetë na thatë për kreditë e donatorëve nga konferenca për rindërtimin. E keni të shkruar 90 mln euro të finalizuara, 160 në proces. Ku është reflektuar. Janë angazhime që janë marrë pse nuk i keni regjistruar.

Ibrahimaj: Unë për herë të tretë ju përsëris materialin për borxhin  do ju vihet në dispozicion nesër.