Oficerët doganorë të ishullit St. Barts kryen një kontroll rutinë në jahtin luksoz të themeluesit të Amazon, Jeff Bezos, natën e Vitit të Ri.

Sipas fotove të publikuara nga DailyMail, disa zyrtarë, përfshirë dy burra dhe dy gra, u panë duke inspektuar për më shumë se tre orë jahtin, i cili njihet si jahti më i madh me vela në botë.

Oficerët u shëtitën nëpër kuvertë, komunikuan me pasagjerët dhe biseduan edhe me të fejuarën e Bezos, Lauren Sanchez.

Një burim për DailyMail deklaroi se inspektimi ishte një procedurë rutinë dhe nuk kishte asnjë dyshim specifik ndaj jahtit apo pasagjerëve.

Kontrolle të tilla janë të zakonshme në portet e njohura për jahtet luksoze, veçanërisht gjatë periudhës së festave, kur trafiku detar është më i madh.