Korçë – Pas një hetimi të gjatë dyvjeçar, Policia e Korçës ka finalizuar operacionin e koduar “Goskova”, duke zbardhur vjedhjen e ndodhur në dhjetor 2023 në banesën e shtetasit Andi Snaço në fshatin Goskovë, ku u vodhën 600 mijë lekë të rinj.

Në kuadër të hetimeve, tre persona janë identifikuar si autorë të ngjarjes, mes tyre një 16-vjeçar, nip i pronarit të banesës, dhe një person i dënuar më parë për vepra penale të tjera.

Shtetasi Samuel Tepexhik, 24 vjeç, banues në Korçë, u arrestua për veprat penale “Vjedhja me pasoja të rënda, e kryer në bashkëpunim” dhe “Shtytja e të miturve në krim”. Ndërkohë, 21-vjeçari A. Ç., i arrestuar më parë për një tjetër vepër penale, i cili ndodhet në burg, i është ekzekutuar masa e sigurisë “Arrest në burg” për këtë ngjarje.

I mituri 16-vjeçar do të hetohet në gjendje të lirë, por me detyrim për t’u paraqitur në Policinë Gjyqësore.

Policia njofton se, në bashkëpunim me Prokurorinë, hetimet intensive me metoda speciale zbuluan se autorët kishin detyruar djalin e pronarit të banesës të gjente çelësin e kasafortës, nga ku morën shumën e parave.

Materialet procedurale i janë kaluar Prokurorisë për veprime të mëtejshme.